Faahfaahinno dheeraad ah ayaa kasoo baxaya weerar saraakiil ka tirsan ciidamada booliska dowladda Maraykanka ay ku qaadeen wiil Soomaali ah oo ka mid ah dadka Soomaaliyeed ee ku dhaqan magaalada Columbus ee waddankaasi, halkaas oo lasoo wariyay in ugu dambayn ay ku toogteen wiilkaasi.
Muuqaal lagu faafiyay baraha bulshadu ku wada xiriirto ayaa muujinaya ciidamada Maraykanka oo weerar ku ekeynaya gaari uu watay wiilkan dhalinyarada ah oo da’diisa lagu sheegay 22 sano jir, muuqaalka ayaana muujinaya in wiilkaasi uu iska caabiyay weerarka kaga yimid dhanka ciidamada booliska saliibiyiinta, balse rassaas xooggan oo ay dhowr jiho kaga fureen ayaa keentay in uu goobta ku dhinto.
Taliska ciidamada booliska Maraykanka oo dhacdada ka hadlay waxay sheegeen in iska caabinta uu sameeyay wiilkan dhalinyarada ah oo magaciisa lagu sheegay Xamza Yuusuf uu kaga dhaawacmay sarkaal ciidan oo booliska ka tirsan, kaasi oo ay sheegeen inay geeyeen cisbitaalka Grant Medical Center.
Booliska Maraykanka ayaa ku andacoonaya in wiilkaasi uu rassaas ku furay xarun shirkadeed oo uu ka howlgalayay, balse ma jirto cid kale oo xaqiijinaysa warka ciidanka Maraykanka, waxayna sheegeen inay daqiiqado kadib soo gaareen goobta, halkaasina ay toogasho ugu gaysteen wiilkan kasoo jeeda Soomaaliya, halkaasina uu ku geeriyooday.
