Inta la xaqiijiyay waxaa shilkan oo ahaa mid gaari ku dhintay sarkaal ka tirsan ciidanka booliska ee dowladda Kenya.
Ilo wareedyo Kenyaan ah ayaa xaqiijiyay in shilkan uu yimid kaddib markii ay isku dhaceen labo mooto oo uu mid ka mid ah la socday sarkaalka, taas oo keentay in uu goobta ku qurbaxo.
Madaxa ciidanka booliiska ee deegaanka Likoni ee Mombasa, Timothy Muasya, ayaa xogta shilkaasi u xaqiijiyay warbaahinta, isagoo tilmaamay in maydka sarkaalka ka tirsan booliska la geeyay xarunta la dhigo maydadka ee cisbitaalka Mombasa.
Sidoo kale sarkaalkan ayaa xusay in qof kale uu dhaawac culus kasoo gaaray shilka, kaas oo dhaawiciisa la dhigay xarun caafimaad.
Sawirro lagu faafiyay mareegaha Internet-ka ayaa muujinayay burburka iyo raadka xooggan ee uu shilkaasi ku reebay mootooyinkii isku dhacay.
Shilkan ayaa qayb ka noqonaya shilal dhowr ah oo ka dhacay gudaha dalka Kenya, kuwaas oo ay dhimasho iyo dhaawac ku noqdeen saraakiil iyo askar Kenyaan ah.
10-ka bishii June 2012-kii ayay ahayd markii shil diyaaradeed oo ka dhacay kaynta Ngonga ee degaanka Kibiku uu ku dhintay waziirkii Amniga gudaha ee Kenya, halka sidoo kalena uu shilkaas kula dhintay ku xigeenkiisa.
