War rasmi ah oo kasoo baxay Xarakada Al Shabaab ayaa looga hadlay duqeymaha indha la’aanta ah ee diyaaradaha dagaalka Mareykanka ay ka geysanayaan dalka Soomaaliya.
Taliska ciidamada Shabaabul Mujaahidiin ayaa beeniyay sheegashooyinkii saacadihii lasoo dhaafay kasoo baxayay Mareykanka ee ahaa in Suldaankii beesha Habar Gidir ee lagu dilay Jamaame uu katirsanaa Saraakiisha ciidanka Xarakada.
“Waa been aan sal iyo raad laheyn warka kasoo yeeray dowladda Mareykanka ee ku saabsan in Suldaankii Beesha Habar Gidir ee ay ku dishay duleedka Jamaame uu ahaa sarkaal katirsan ciidamada Mujaahidiinta, waxaan caddeynaynaa in qofka ay dileen uu ahaa Suldaan kamid ah salaadiinta beelaha Soomaaliyeed” ayuu yiri Sheekh Abuu Muscab oo ah Afhayeenka ciidamada Al Shabaab.
Mareykanka ayaa Beegsi ku haya dadka indhaha u ah bulshada Soomaaliyeed sida culimaa’udiinka, salaadiinta iyo ganacsatada kadibna si aan fal dambiyeedkaas loogu raacan ayuu ku sheegaa in uu dilay Saraakiil katirsan Al Shabaab.
Suldaan Max’med Cabaas oo ahaa Suldaankii Beesha Habar Gidir ayay diyaarad Mareykanku leeyahay shalay barqadii ku duqeysay duleedka degmada Jamaame ee Jubbada Hoose waxaana xusid mudan in xilligii ladilayay Suldaanka uu safar ahaa.
