Wararka ka imaanaya magaalda Qabri-bayax ee ka tirsan gobolka Faafan ee dhulka Soomaaligalbeed ee ku hoos jira gumeysiga xabashida Itoobiya ayaa sheegaya in ciidamada booliska xabashida ay weerareen dad shacab ah oo ku sugnaa magaaladaasi.
Ciidankan oo si gaar ah uga tirsan taliska waxay ugu yeeraan Finaasta oo ah ciidamo uu Abiy u sameystay boobka hantida shacabka Soomaaliyeed, ayaa isku dayay inay dhacaan gaari u rarnaa ganacsatada degmada Qabri-bayax.
Dhalinyaro dadka deegaanka oo ka carooday boobka hantiyeed ee ciidamada kuffaarta xabashida ayaa is hortaag ku sameeyay ciidamadii doonayay inay dhacaan gaariga u rarnaa dadka shacabka ah.
Ilo wareedyo deegaanka ah ayaa soo sheegay in rassaas ay fureen ciidamada Abiy inay ku dhaawacmeen ugu yaraan saddex qof oo shacab ah, kuwaas oo la geeyay xarumaha caafimaadka.
Ciidamada is hortaagga lagu sameeyay waxaa lasoo wariyay inay gurmad ka heleen dhanka milatariga xabashida Itoobiya, waxayna ilo wareedyadu intaas ku dareen in Finaastu kaxaysteen gaariga dadka rayidka ah u rarnaa, gadood dadweyne ayaa ka billowday magaalada oo ka dhan ah ciidamada xabashida.
Dowladda xabashida Itoobiya waxay howlgalisay ciidamo gaar ah oo 2 qayb ka kooban, kuwaas oo loo dhisay boobka hantida shacabka Soomaaliyeed ee isugu jirta xoolaha nool ee la dhaqdo, gaadiidka iyo ganacsiyada kale, si loo boobo hantidoodna lagu shaabadeeyo kuwa si kontorobaan ah deegaanka kusoo galay.
