Kooxo hubeysan ayaa magaalada Al-geyda ee gobolka Al-Muhra ee dhaca bariga dalka Yaman waxay ku toogteen imaamkii Masjidka magaaladaas oo lagu magacaabo Sheykh Mustafaa Cabdullaahi Al-Dhayib.
Gelinkii dambe ee shalay ayaa rag hubeysan waxay dhowr xabadood ku dhufteen wadaadka, taas oo keentay in durba uu halkaas ku quur baxo.
Beegsiga A’imada Masaajida ayaa kusoo badanayo dalka Yaman tan iyo sanadkii 2014, waxaana bishii Octobar oo kaliya magaalada Cadan ee koonfurta Yaman lagu iqtiyaalay 3 Imaam.
Dowladda Imaaraatka ayaa lagu eedayaa iney aalaaba disho culimada iyo mashaa’ikhda kasoo horjeeda siyaasadeeda, waxaana ay sooo shaac bixineysaa culimo ay iyadu wadato, kuwaas oo la dhacsan siyaasadda dowladda Imaaraatka.
Waxay dowladan Koonfurta Yaman ka sameystay xabsiyo waaweyn oo ay ku tacdiibiso dadka Muslimiinta, iyadoona dhowrjeer hay’adaha sheegta xuquuqda Insaanka ay soo saareen warbixinno banaanka soo dhigaya wejiga foolxumada badan ee Imaaraatka.
Dowladda Imaaraatka ayaa saameyn waxay ku leedahay dalka Soomaaliya, iyadoona magaalada Muqdisho ay ka joogaan ciidamo iyada u shaqeeya, waxaana ay la wareegtay dekado badan oo ay ku jirto mida Berbera iyo Boosaaso.
