Inta la xaqiijiyay ilaa laba qof oo Kenyaan ah ayaa dhintay, halka kuwa kalena ay dhaawacyo soo gaareen, kaddib shil xooggan oo ka dhacay inta u dhaxayso Nakuru iyo Eldoret ee dalka Kenya.
Shilkan gaari ayaa si gaar ah uga dhacay aagga Sobea ee magaalada Salgaa, gaar aaan jidka wayn ee u dhexeysa Nakuru iyo Eldoret, waxaana shilkaasi uu u dhaxeeyay baabuur nooca mataatuuda ah oo kusii jeeday Nakuru iyo gaadiid kale oo xamuul iyo taksi ah.
Dad goobjoogayaal ah ayaa warbaahinta maxalliga ah u sheegay in gaariga xamuulka uu ku dhacay mataatuuda, xilli dareewalka Mataatuuda uu isku dayayay in uu ka weecdo gaariga Taksiga oo si xowli ah ku socday.
Shilkan waxaa sidoo kale ku dhaawacmay ilaa siddeed xubnood, kuwaas oo la xaqiijiyay inay soo gaareen dhaawacyo culus, waxaana dhaawacyadooda la geeyay cisbitaalka wayn ee Nakuru.
Dhacdadan ayaa kusoo beegantay, xilli sabtidii lasoo dhaafay sidan oo kale ay shan qof ku dhinteen, 8 kalena ay ku dhaawacmeen shil culus oo ka dhacay waddada xiriirisa Eldoret iyo Nakuru , kaasi oo yimid kaddib markii ay isku dhaceen gaadiidka mataatuuda iyo baabuur xamuul ah.
