Wararka ka imaanaya waddanka Suudaan ayaa sheegaya in la xiray soohdinta uu dalkaasi la wadaago Itoobiya, xilli maalmihii lasoo dhaafay jabhadda hubeysan ee Fano ay la wareegtay gacan ku haynta magaalooyin ku teedsan soohdinta.
Ilo wareedyo dhanka caskariga ayaa warbaahinta dalkaasi u xaqiijiyay in maamulka dowladda Suudaan ee ka howlgala gobolka Al-qadaarif ee dhaca bariga Suudaan uu xiray macbarka lagu magacaabo Al-qalabat ee u tallaaba dhanka Itoobiya.
Wargayska Suudaan Tribune, ayaa ilo wareedyo millatari kasoo xigtay in maamulka gobolka Al-qadaarif uu xiray xuduudka Al-Qalabat, taasoo uu sheegay inay keentay in uu gabi ahaanba istaago dhaq-dhaqaaqii ganacsiga ee u dhexeeyay waddamada Suudaan iyo Ethiopia.
Xogo uu helay wargayska ayaa intaas kusii daraya in dowladda Suudaan ay ciidamo isugu jira booliska federaaliga ah iyo kuwa millatariga Itoobiya ee ku sugnaa aagga xuduudka ay u ogolaatay inay soo galaan dhulka Suudaaniyiinta kaddib markii ay u hogaansameen hub ka dhigis lagu sameeyay.
Warbaahinta Suudaan waxay sheegtay in amarka lagu xiray xuduudka uu yimid ka dib markii maleeshiyada jabhadda Faano ee ka dagaalanta gobolka Axmaarada ee waddanka Itoobiya ay la wareegeen magaalooyin dhowr ah oo ay ugu dambeysay Metema oo ah magaalo dhacda Itoobiya balse ku dhagan magaalada Al-qalabat ee waddanka Suudaan.
Waxaa xusid mudan in maleeshiyada fallaagada ah ee Fano ay horay ula wareegeen gacan ku haynta halka ay iska galaan Itoobiya iyo Sudan, dhowr maalmood ka hor waxay warbaahinta taageerta Fano sheegtay in maleeshiyaadka Jabhaddu gacanta ku dhigeen magaalada Gelegu ee dhacda xuduudka Sudan, maalmihii u dambeeyay na ay horumarro dhanka dagaalka ka sameynayeen deegaanada soohdinta dhaca.
