Wararka ka imaanayo wadanka Liibiya ayaa sheegaya in tiro dhalin yaro tahriibayaal ah lagu dilay meel ku dhow Magaalada Bani Walid ee dhacda Woqooyi Galbeed Wadanka Liibiya.
Inta la xaqiijiyey 15 qof oo tahriibayaal ahaa ayaa geeriyooday, ku dhawaad 30-kalena way dhaawacmeen kadib markii ay rasaas ku fureen kooxaha waxtahriibaya ee loo yaqaano Magafe, xilli dadkani ay isku dayayeen inay ka baxsadaan goob ay ku xirnaayeen oo wadankaasi ku taala.
Wararka ayaa sheegaya in dadka la rasaaseeyey tiro ahaan ay gaarayeen ilaa boqol qof oo kasoo kala jeeda wadamada dhaca qaarada Africa, haba ugu badnaadaane Somalia, Eritrea, iyo Ethiopia.
Dhakhaatiirta Caafimaadka Isbitaalka Magaalada Bani Walid ayaa sheegay in isbitalka lasoo gaarsiiyay ilaa 25 qof, oo 7 kamid ah xaaladooda caafimad ay tahay mid adag ayna jirkooda ku taalo rasaas fara badan.
Inta badan dadkii ku jiray goobta xabsiga ah ayay u suurta gashay inay ka baxsadaan,balse Tobanaan qof ayaa ku haray gacanta kooxaha ku caan baxay arxan darada ee loo yaqaane Magafe, kuwaas oo waayadan danbe bilaabay inay dadka adoonsadaan, kadibna ku iibiyaan suuqyo ay u sameysteen.
Dadka intooda baxsatay ayaa gudaha u galay magaalada Bani Waliid waxa ayna galeen Masjid weyn oo halkaasi ku yaala, iyagoo ka dalbaday caawinaad, waxaana lagusoo waramaya in dadka deegaanka ay u gurmadeen.
Magaalada Bani Waliid oo dhacda woqooyi galbeed wadanka Liibiya, ayaa 170-Km u jirta magaalada caasimada ah ee Jarabulis, waxa ayna marin muhiim ah u tahay dadka tahriibayaasha ah ee doonaya inay gaaraan Wadanka Talyaaniga iyagoo ka gudbaya Bada Mediterranean-ka, oo ay ku babe,en kumanan dhalin yaro ah oo kasoo jeeda wadamada Africa.
14ki Bishi February, sanada 2018 ayay ahayd Markii 31 qof oo tahriibayaal ahaa ay ku dhinteen gudaha magaalada Bani Waliid kadib markii uu la rogmaday gaari xamuul ah oo ay ku saarnaayeen ku dhawaad 300-qof, kuwaas oo tobanaan kamid ahna dhaawacyo ay soo gaareen.
