Taliyaha ugu sarreeya ciidanka difaaca Kenya ee loo yaqaan KDF, General Francis Ogolla, ayaa la xaqiijiyay in uu ku dhintay shil diyaaradeed oo maanta ka dhacay bariga Marakwet ee wadanka Kenya, halkaas oo ay kula halaagsameen askar ka tirsan ciidanka Difaaca.
Shilkan diyaaradeed ayaa gelinkii dambe ee maanta si gaar ah uga dhacay halka lagu magacaabo Kaben oo dhanka bari ka xigta Marakwet, halkaas oo taliyaha ciidanka difaaca Kenya iyo xubno ka tirsan ciidankiisa ay kula dhacday diyaarad nooca kuwa qumaatiga u kacda oo ay wateen, taasi oo la sheegay inay dhulka ku dhacday kaddibna uu dab qabsaday.
Saraakiil ka tirsan Kenya ayaa marka hore xaqiijiyay dhimashada shan xubnood, wargayska The Star ee kasoo baxa dalkaasi ayaa dib ka xaqiijiyay dhacdada iyo geerida taliyaha ugu sarreeya ciidanka Kenya, Generaal Francis Omondi Ogolla, kaasi oo markii hore xaaladdiisu ay hubanti la’aan ahayd, balse dib laga xaqiijiyay geeridiisa.
Taliyahan dhintay ayaa da’diisa lagu sheegay 61 sano jir, waxaana uu taliska ciidanka Kenya ka mid ahaa tan iyo 24-kii Abriil 1984-tii, diyaaradda uu shilka ku galay waxaa la wariyay inay la saarnaayeen 7 askari oo ka tirsan ciidanka Kenya, duuliyaha iyo 4 kale ayaa loo badinayaa inay la dhinteen Generaalka.
10-kii June 2012-kii, ayay ahayd markii sidan oo kale shil diyaaradeed oo ka dhacay gudaha dalkaasi uu ku dhinteen, George Saitoti oo ahaa wasiirkii amniga Kenya iyo ku xigeenkiisa iyo xubno kale oo ilaaladiis iyo kaaliyeyaashiisa ah, waxaana shilkaas uu kusoo beegmay bilooyin uun kaddib markii Kenya ay duullaan gardarro ah kusoo gashay qaybo ka mid ah Soomaaliya.
Hoos Ka Daawo sawirrada generaalka iyo burburka diyaaradda.
