Inta la hubiyay ugu yaraan saddex xubnood oo sahaayino ah ayaa lagu dilay, halka lagu dhaawacay tiro intaas ka badan, kaddib weerar toogasho ah oo maanta ka dhacay meel u dhow magaalada Qal-qiiliyyah ee daanta galbeed ee Falastiin.
Idaacadda Yahuudda ayaa sheegtay in weerarka uu beegsaday gaari Bus ah oo ay la socdeen xubno mustowdhiniin ah, kuwaas oo mar qura ka war helay rassaas kusoo hoobanaysa gaarigaasi, taasi oo keentay in isla goobta ku dhintaan saddex xubnood, oo laba ka mid ah ay haween yihiin halka kan saddexaad ah uu nin ahaa, waxaa sidoo kale ku dhaawacmay 9 kale.
Dhaawacyada sagaalka xubnood ayaa lasoo wariyay in mid ka mida uu ku sugan yahay xaalad halis ah, sida lagu sheegay warka kasoo baxay maamulka gumeystaha Yahuudda.
Weerarka ayaa si gaar ah kaga dhacay mustowdhanada lagu magacaabo Kidumim ee dhacda bariga Qal-qiiliyah, waxaana si nabad galyo ah goobta kaga baxsaday dhalinyaradii Falastiiniyiinta ahaa ee howlgalka fuliyay.
Abuu Cubeydah oo afhayeen u ah garab ka mid ah kooxaha wax iska caabinta ayaa qoraal uu dhigay bartiisa gaarka ah ee Telegram-ka ah ku bogaadiyay howlgalka toogashada ah ee ka dhacay daanta galbeed ee Falastiin, isagoo dhanka kale farriimo adag u diray maamulka sahaayinada.
