Wararka ka imaanaya waddanka Maraykanka ayaa xaqiijinaya in toogasho culus oo ka dhacday mid ka mid ah gobollada waddankaasi ay ku dhinteen dhowr xubnood oo ameerikaan ah, xilli ay faraha ka baxeen shilalka toogasho.
Warbaahinta maxalliga ah ee waddankaasi Mareykanka ayaa sheegtay in toogashadan ay ku dhinteen ugu yaraan shan qof oo ameerikaan ah, toogashadan ayaana si gaar ah kaga dhacday deegaanka Cleveland oo ka tirsan gobolka Texas ee dalka Mareykanka.
Maamulka ayaa bayaan uu soo saaray ku xaqiijiyay in 4 qof ay ku dhinteen goobta ay toogashadu ka dhacday ee deegaanka Cleveland, halka kii shanaadna uu ku dhintay cisbitaalka taasi oo tirada guud ee dadka dhintay ka dhigaysa shan xubnood.
Dadka toogashadan lagu dilay waxaa ku jiray ilmo siddeed jir ah waxayna toogashadu ka dhacday afaafka hore ee guri kuyaal deegaankan ka tirsan gobolka Texas ee dalka Maraykanka.
Dhacdadan toogasho ee laga soo tabiyay Waddanka Maraykanka ayaa kusoo beegantay xilli waddankaasi uu goob joog u noqday shilalka toogashada ah ee soo noqnoqda, xogihii u dambeeyayna waxay muujinayaan kororka noocyada kala duwan ee rabshadaha hubaysan sida dil ama is-dilidda shakhsiga ah iyo toogasho wadareedka kuwaas oo lagu tilmaamay inay ku socdaan heerkii ugu sarreeyay abid.
Toddobaadkii hore ayay ahayd markii toogasho ka dhacday goob ay ka socday xaflad lagu toogtay 9 qof oo dhallinyaro Ameerikaan ah, toogashaas ayaa iyana ka dhacday isla gobolkan Texas.
