Ugu yaraan hal qof oo Ameerikaan ah ayaa dhintay halka saddex kalena ay dhaawacmeen ka dib weerar toogasho ah oo ka dhacay magaalada Washington ee caasimadda u ah waddanka Maraykanka.
Saraakiil ciidan oo ka tirsan ciidamada booliska Maraykanka ayaa warbaahinta u xaqiijiyay in toogashadan ay marka hore ku dhaawacmeen ugu yaraan 4 qof oo ku sugnaa goob uu aas ka socday oo kutaal caasimadda Washington, hal qof oo ka mid ah dadkii ay dhaawacyadu soo gaareen ayuu boolisku xaqiijiyay in uu u dhintay dhaawaca.
Weerarkan toogasho ee ka dhacay magaalada caasimadda ah ee Washington ayaa kusoo beegmaya xilli saacadihii ina dhaafay toogasho tan la mid ah ay ka dhacday mid ka mid ah magaalooyinka wadanka Maraykanka, kaas oo sababay dhimashada ugu yaraan 5 qof halka ay ku dhaawacmeen 6 kale.
Dadka toogashadaas ku dhintay waxaa ka mid ahaa askari ka tirsanaa ciidamada booliska oo kusoo baxay dhacdada, kaas oo isku dayay in uu toogto weeraryahanka balse goobta lagu toogtay.
