Xisbiga siyaasadda dadka Tigreegga ee TPLF magaciisa loo soo gaabiyo ayaa shir uu ka yeeshay khilaaf hoose oo ka dhex jiray xisbigaasi kasoo saaray go’aamo dhabar-jab ku ah Abiy Axmed ra’iisul wasaaraha xabashida Itoobiya.
TPLF ayaa war-murtiyeed ay shirkan kasoo saartay ku iclaamisay hoggaan cusub oo uu majaraha u qaban doono Debretsion Gebremichael oo ahaa ninkii dagaalka adag lasoo galay nidaamka Abiy Axmed, iyadoo shirkaas lagu go’aamiyay in meesha laga saaro madaxweynihii kumeel gaarka ee ismaamulka Tigray ee uu soo magacaabay ra’iisul wasaaraha xukuumadda Addis-ababa, Getachew Redda.
TPLF, waxay sidoo kale ku xigeenka Debretsion Gebremichael u doorteen , Amaniel Assefa, kaasi oo geli doono booska laga saaray Getachew Redda.
Xisbiga ayaa sidoo kale doortay xubnaha goleyaasha Fulinta, midka dhexe iyo sidoo Kale Komishinka dhexe Xisbigaasi ku matali doono, waxayna liiska ka saareen 17-kii xubnood ee ku feeysanayd Getachew Redda.
Getachew Redda oo ah ninka isaga iyo golihiisa meesha laga saaray ayaa horay u shaaciyay in uusan taageeri doonin wax walba oo kasoo baxay shirka u dhaxeeyay hoggaanka TPLF, wuxuuna ku sifeeyay shirkaasi mid sharci darro ah.
“Wax kasta oo kaso baxa shirka TPLF wuxuu noqon doonaa mid aan waxba ka jirin, Wixii dhibaato ka timaadana waxaa masuuliyaddeeda qaadi doona kooxda tiradda yar ee wadda.” Ayuu horay u yiri Getachew Redda ee laga saaray hoggaanka TPLF.
Warbaahinta dalka Eritrea ayaa si wayn u tabinaysay shirkan u dhaxeeyay TPLF ee isbeddelka lagu sameeyay, meeshana looga saaray maamulkii uu soo dhistay Abiy Axmed, lama oga sida uu noqon doono xaalka ismaamulka Tigray.
