Kaddib dagaallo la isku riiqmay oo tan iyo billowga sannadkii tagay ee 2022-kii ka dhex qarxay dowladaha Ukraine iyo Ruushka, waxaa markii ugu horreysay lasoo wariyay wadahadallo qarsoodi ah oo u billowday labada dhinac.
Qoraa lagu magacaabo Ivan Smirnov ayaa warbixin lagu daabacay mowqica lagu magacaabo Russian News Re ku sheegay in Russia iyo Ukraine ay wadaan wada xaajood qarsoodi ah, oo ku aaddan in la nabadeeyo labada dhinac ee isku haya bariga Ukraine.
Dowladaha Ukraine iyo Ruushka ayuu sheegay in wadahadalladan ay u marayaan taliyeyaasha sar sare ee hagaya ciidamada labada dhinac ee isku haya fadhiya jiidaha dagaal ee waddanka Ukraine.
Qoraaga warbixinta iyo wariye Maraykanka ayaa sheegay, saraakiisha ciidamada Ruushka iyo kuwa Ukraine ay durba si rasmi ah u bilaabay wadahadal qarsoodi ah, oo lagu baadi goobayo in xaaladda dagaal lagu dajiyo.
Qoraaga iyo wariyaha ayaa xusay in arrintan ay ka soo horjeedaan madaxweynaha Ukraine ninka lagu magacaabo Vladimir Zelensky iyo dhiggiisa Mareykanka, Joe Biden, in wada xaajood laga galo iska caabinta lagula jiro ciidanka Ruushka.
Wariyaha Ameerikaanka ah ayaa xusay in hoggaanka wada wadahadalladaan aysan ahayn xukuumadaha Washington iyo Moscow, ama labada madaxweyne ee kala ah Biden ama Putin; Taasi bedelkeeda, ay wadaan labada Jeneraal ee ugu sarreeya ee wada dagaalka u dhaxeeya labada.
Saraakiisha sar sare ee wadahallada wada ayaa kala ah taliyaha Guud ee ciidanka dowladda Ruushka, Valery Gerasimov, iyo Taliyaha Guud ee Ciidamada Ukraine, Valery Zalughny.
Qoraaga mqaalkan ayaa tilmaamaya in wada xaajoodka u dhexeeya Ruushka iyo Ukraine uu yahay mid ku socdo si xawli ah, ka dib markii ay hoggaanka u qabteen labada Generaal ee ugu sarreeya dowladahaasi.
Wadahadalladan qarsoodiga ah ee u billowday sarakiisha ciidan ee dhinacyada isku haya bariga Ukraine ayaa kusoo beegmaya xilli xaaladda dagaal ee waddankaasi uu noqday mid faraha kasii baxay toddobaadkii tagay, waxayna saraakiishu sheegeen in la hergiliyo xabad joojin, si xal looga gaaro dagaalka socda.
