Halaag daran ayaa ciidamada Xabashida Itoobiya iyo maleeshiyaadka kasoo horjeeda ku kala gaaray dagaallo culus oo ka dhacay gobolka Tigray ee dhaca waqooyiga wadankaasi.
Wararka ka imaanaya jiidda hore ee dagaalka ayaa sheegaya in dagaallo lagu hoobtay ay shalay halkaas ku dhaxmareen ciidamada dowladad Itoobiya iyo maleeshiyaadka qowmiyadda Tigreega.
Wariyaal ayaa soo sheegay in boqolaal meydad iyo dhaawacyo ah lageeyay gobolka Amxaarada oo talis u ah howlgalka uu Abiy Axmed ku iclaamiyay jabhadda Tigeerga.
Shalay waxaa lasoo calaamadeeyay khasaarihii ugu xooganaa ee dhinacyada kala gaaray tan iyo markii uu dagaalku bilaawday waqti hadda laga joogo 7 maalmood.
Saxafiyiin ka socday wakaaladda wararka ee Reuters oo ku safrayay Tigray iyo gobolka dariska la ah ee Amxaarada waxay arkeen gawaari xamuul ah oo ay ka buuxaan maleeshiyo hubeysan iyo gawaari ay saaran yihiin qoryaha darandooriga u dhaca oo ku sii qulqulaya jiida hore si ay u taageeraan ciidamada dowladda ee halkaas dirirta xooggan uga jira.
“Walaaca laga qabo in Itoobiya ay gasho qalalaase waa mid aan sal lahayn oo ka dhashay fahamka aan si qoto dheer u fahansaneyn waxay ay tahay Itoobiya,” ayuu R/wasaaraha Itoobiya ku soo qoray bartiisa Twitter-ka isagoo sharci ka dhigayay duullaanka ay ciidamadiisu ku qaadeen gobolka Tigray.
Ilo wareedyo ayaa sheegaya in dagaalladii dhacay labadii maalmood ee lasoo dhaafay ay ahaayeen kuwa aad uqaraar ayna dhinacyadu iska dileen ku dhowaad 600 oo askari halka boqolaal kale ay dhaawacmeen.
Melleteriga Itoobiya oo ay kaabayaan kumanaan kun maleeshiyaad ah oo badankood kasoo jeeda qowmiyadda Amxaarada ayaa ka gudbay xuduudda Tigrayga waxayna hadda bilaabeen in ay qabsadaan tuulooyinkii ugu horreeyay oo ay kamid yihiin Kirakir iyo Daansh taas oo ka dhigay in ay xaqiijiyeen guushii ugu horraysay oo dhanka xuduudda amxaarada ah.
Ciidamada Abeey ayaa gelinkii hore ee maalintii axadda qabsaday wadada istiraatiijiga ah ee isku xirta Tigray iyo wadanka suudaan waxaa kale oo ay soo xirteen xuduudda Eereteriya oo horay ay umaamulayeen maleeshiyaadka Ururka TPLF.
Sarkaal militari oo kusugan Amxaarada kana tirsan dhanka ciidamada federaalka Itoobiya ayaa u sheegay wakaalada wararka ee Reuters in iska hor imaadyo ay la galeen ciidamada Tigreega oo ka dhacay Kirakir Kirakir ay ku dileen kudhowaad 500 oo ah askarta Tigreega.
Seddex ilo wareed oo amni oo Amxaaro ah lana lashaqeynaya ciidamada federaalka ayaa sheegay in ciidanka Itoobiya boqolaal askari looga dilay dagaalkii ka dhacay tuulada Dansha.
sababta uu ubatay khasaaraha Daansha ayaa lagu sheegay ciidamada Tigreega oo godad waaweyn qotay kadibna mid mid utooganayay ciidamada Itoobiya oo iyagoo lugaynaya weerar qaaday.
