Wararka ka imaanaya magaalada Toronto ee wadanka Canada ayaa sheegaya in gaari la jiirsiiyey dad fara badan oo marayey mid kamid ah wadooyinka Mashquulka ah ee Magaalada.
Inta la xaqiijiyey 9 qof ayaa dhimatay, 16 kalena way dhaawacmeen kadib markii gaariga oo xowli ku socday uu jiiray dadkaan oo marayay goob isgoys ah oo dhacda galbeedka Magaalada Toronto.
Booliska wadanka Canada ayaa sheegay inay gacanta ku dhigeen, wadihii gaariga dadka jiiray balse aysan ogayn ilaa hada sababta ku riixday inuu dadkaan Jiiro iyo hadii falku uu ahaa mid ula kac uu u sameeyey.
Raisal wazaaraha Canada ayaa dhacdadan ku tilmaamay falkan mid argagax leh
Qof goob joogayaal ayaa warbaahinta u sheegay inay arkayeen, gaari cad oo dadka dul maraya isaga oo xowli ku socda, kadibna isku dayey inuu goobta ka baxsado.
Isku socodkii Magalada Toronto oo kamid ah magaalooyinka ugu Mashqulka badan dunida ayaa mudo hakad galay, waxaana la joojiyey tareenada dhulka hoostiisa Mara, sidoo kalena waxaa la xiray isgoysyo muhiim ah, si looga fogaado weeraro midkaan lamid ah oo magaalada ka dhaca..
Bishii Oct Sanadii 2017-ka ayaa dhacda noocan oo kale ah waxa ay ka dhacday magaalada Edmonton oo katirsan Magaalooyinka wadanka Canada, waxaana ku dhintay weerarkaas 4 qof halka ay ku dhaawacmeen tiro kale.
Magaalooyinka waaweyn ee wadamada reer galbeedka ayaa waxaa sanadihii dambe kusoo badanayay weerarada loo adeegsado gaadiidka ee dadka ku beegsanaya wadooyinka, waxaana dhacdooyin kala duwan ay ka dheceen wadamada Faransiiska, Jarmalka, Biljamka iyo Ingiriiska.
