Khasaara lixaad leh ayaa ka dhashay dagaallo culus oo dib uga qarxay deegaan katirsan gobolka Mudug ee dhaca bartamaha dalka Soomaaliya.
Wararka ka imaanaya deegaanka Bacaadweyn ayaa sheegaya in dagaal qaraar uu maanta gelinkii ku dhaxmaray dagaalyahanada Al Shabaab iyo ciidamo katirsan dowladda Federaalka.
Ilo wareedyo ayaa xaqiijinaya in dagaalkii galabta ay ku dhinteen askar iyo saraakiil farabadan, meydadka illaa 10 askari ayaa lagu arkay goobta dagaalka.
Dagaalyahannada Al Shabaab ayaa la sheegay in ay weerar madaafiic hoobiyaal ah loo adeegsaday ku qaadeen deegaanka Bacaadweyn kadibna waxaa banaanka usoo baxay ciidamo katirsan qeybta 21aad ee dowladda Federaalka halkaas oo uu ka dhacay dagaal saacado badan qaatay.
Xilligii uu dagaalku dhacayay waxaa deegaanka ku sugnaa wafdi uu hoggaaminayay dagaal ooge Cabdi Qeybdiid oo katirsan Senetarrada golaha Aqalka sare.
Wariye ku sugan gobollada dhexe ayaa warbaahinta u sheegay in Jihaadiyiinta Al Shabaab ay goob fagaare ah kusoo bandhigeen meydadka illaa 10 askari.
Wararka ayaa intaas ku daraya in xilligii madaafiicda lagu duqeynayay deegaanka Bacaadweyn uu ku sugnaa wafdi uu hoggaaminayay Cabdi Qeybdiid oo katirsan Senetarada aqalka sare iyo mas’uuliyiin katirsan maamulka isku magacaabay ‘Galmudug’ waxaana la sheegay in ciidamo daacad u ah Qeybdiid ay dagaalka qeyb ka ahaayeen.
War rasmi ah oo kasoo baxay xaralada Mujaahidiinta Al Shabaab ayaa lagu sheegay Meydad iyo dhaawacyo isugu jira 30 askari lageeyay Bacaadweyne islamarkaana ay iyagu gacanta ku hayaan meydadka 10 Askari.
