Inta la xaqiijiyey ugu yaraan 20 ruux ayaa dhimatay, tobanaan kale waa ay dhaawacmeen kadib weerar inqimaasi ah oo naftood hureyaal katirsan Al-Shabaab ku qaadeen mid kamid ah Hotelada ugu caansan ee magaalada Muqdisho.
Hotelkan oo lagu magacaabo Elite ayaa hooy u ah madaxda dowlada, saraakiisha xukuumada iyo diblumaasiyiinta reergalbeedka ee ka howlgala magaalada Muqdisho, waxaana uu ku yaalla badda qarkeeda, si gaar ah xeebta loo yaqaano Liido.
Ciidamo aad u qalabeysan oo katirsan Al-Shabaab ayaa gelinkii dambe ee shaley xoog ku galay dhismaha Hotelka kadib markii ay albaabka hore ku dhufteen gaari miineysan, islamarkaana laayeen ilaaladii Hotelka.
Howlgalkan oo qaatay ku dhawaad muddo 8 saacadood ah ayaa soo gabagaboobay xaley saqdii dhexe sida ay xaqiijiyeen saraakiil DFS iyo mas’uuliyiin u hadashay Xarakada Mujaahidiinta Al-Shabaab.
Xarakada Mujaahidiinta Al-Shabaab waxay sheegtay in weerarkaas lagu dilay in ka badan 20 ruux oo u badan agaasimeyaasha iyo shaqaalaha wazaaradaha, iyo ciidamada amaanka.
Burbur xoogan ayaa sidoo kale soo gaaray dhismaha Hotelka la weeraray oo milkiyadiisa uu leeyahay xildhibaan lagu magacaabo Cabdullaahi Maxamed Nuur oo kamid ahaa waziiradii ka macaashay xukuumadii hore ee Xasan Sheekh Maxamuud, taas oo uu ka ahaa waziiru dowlihii maaliyada.
Calamada.com
