Ciidamada Millatariga xabashida ayaa lagu eedeeyay xadgudbyo ciidan oo ay kula kaceen dad badan oo kasoo jeeda qowmiyadda Tigray-ga, ka dib xasuuq b’an oo ay ka gaysteen xabsiyo kuyaal koonfurta waddanka Itoobiya.
Wargayska Washington Post oo kasoo baxa waddanka Maraykanka ayaa maqaal uu qoray ku iftiimiyay xasuuq ay ku kaceen ciidamada dowlada Itoobiya inta lagu guda jiro gulufka millatari ee xabashida ka wado waqooyiga waddanka.
Xasuuqaan ayaa si gaar ah u naafeeyay 83 qof oo maxaabiis Tigray ah oo ku xirnaa degmada Mirab Abaya oo ka mid ah degmooyinka dhaca gobolka koonfureed ee waddanka Itoobiya, waxaana xasuuqan si gaar ah loogu eedeeyay ciidamada ilaalada maxaabiista.
Wargayskan oo soo xiganaya goobjoogeyaal ku sugan deegaanka ayaa sheegay in dhowr iyo toban askari oo ka tirsan ciidamada ilaalada xabsiyada ee xukuumadda uu fadhigeedu yahay Addis ababa ay xasuuqan isir sifaynta gaysteen taariikhdu markay ku beegnayd 21-kii November sannadii 2021-kii, kolkaas oo maxaabiista Tigray-ga lagu eedeeyay inay ahaayeen maxaabiis dagaal, wallow ay taasi goobjoogeyaashu beeniyeen.
Ilo wareedyada deegaan ee uu soo xigtay wargayskan ayaa sidoo kale sheegay in maxaabiis dhowr ah oo ka cararay xabsiga ay ciidanka Itoobiya ku fasaxeen dadka deegaanka si ay u xasuuqaan, iyagoo dadka u sheegay in maxaabiista baxsadka ka ah ilaalada ay yihiin maxaabiis dagaal oo jariimooyin kula kacay dadka deegaanka.
Xabaal wareed wayn ayaa laga helay darbiga xabsiga taas oo sida la sheegay lagu aasay dhammaan maxaabiistii lagu laayay gudaha iyo dibadda xabsiga sida uu soo sheegay qof goobjooge ah. “Waxa la isu dulsaaray sidii qoryo oo kale,” waxa sidaas wargays Washington Post ku yiri qof goobjooge ah.
Ciidamada millatariga Itoobiya ayaa dhowr jeer oo hore lagu eedeeyay xadgudubyo ciidan oo ay kula kaceen dadka Tigray-ga waxaana badi xasuuqyada ku kacaya ciidanka Millatariga ee kasoo jeeda qowmiyadda Axmaarada.
