Xoogagga kacdoon_wadeyaasha hubeysan ee mucaaradka Suuriya ayaa maanta la wareegay gacan ku haynta magaalada istaraatiijiga ee Xamaah oo saacadihii lasoo dhaafay ay ka socdeen dagaallo culus oo u dhaxeeyay xoogagga mucaaradka iyo nidaamka Nuseyriga iyo xulafadiisa oo dhinac ah.
Mucaaradka Suuriya waxay si rasmi ah ugu dhawaaqeen inay gudaha u galeen magaalada Xamaah ee bartamaha Suuriya dhacda, ayna iyagu maamulayaan xaafadaha ay ka kooban tahay magaalada, dhanka kale wazaaradda gaashaandhiga nidaamka Bashaar Al-asad ayaa sheegtay in ciidamadeedu isaga baxeen magaalada, kaddib markii loo awood sheegtay.
Kooxaha mucaaradka hubeysan ee Suuriya waxay horay u sheegeen inay xoreeyeen oo gacanta ku dhigeen garoonka diyaaradaha ee Xamaah iyo sidoo kale gacan ku haynta dhismaha xarunta booliska ee magaaladaasi, waxay sidoo kale la wareegeen xabsiga dhexe ee Xamaah, halkaas oo ay ka xoreeyeen boqollaal maxaabiis ah.
Madaxa waaxda howlgalada milateriga ee xoogagga kacdoonka Suuriya, Xasan Cabdilghani, ayaa qoraal uu soo bandhigay barta X waxa uu ku yiri “Ciidamadeennu waxay galeen xabsiga dhexe ee Xamaah waxayna ka sii daayeen boqollaal maxaabiis ah, kuwaas oo la dulmay.” ayuu ku yiri.
Muuqaallo lagu faafiyay baraha bulshada ayaa muujinayay xoogagga mucaaradka oo la wareegay saldhigga ciidanka cirka Xama, waxay halkaas ugu tageen tiro diyaaradaha MiG-21s iyo MiG-23 oo ay weheliyaan gaadiid dagaal iyo taangiyo, oo ah kuwa uu farsameeyay Ruushka.
