Askar ka tirsan maleeshiyaadka maamulka Yahuudda ayaa dhimasho iyo dhaawac ku noqday maanta marinka Gaza, kuwaas oo qayb ka ahaa ciidamo isku dayay inay lug kusoo galaan magaalada Gaza.
Taliska ciidanka Yahuudda ayaa shaaciyay in mid ka mid ah askartooda lagu dilay axadda maanta ah gantaal lidka taangiyada ah oo kaga yimid dhanka kooxdaha wax iska caabinta, kaddib isku day duullaan oo ay maanta ku sameeyeen marinka Gaza.
“Hal askari ayaa dhintay, mid kalena dhaawac dhexdhexaad ah ayaa gaaray, labana dhaawac fudud ayaa gaaray, kaddib gantaal lidka taangiyada ah oo lagu soo tuuray taangi iyo gaari Injineer oo ay leeyihiin ciidanka Israa’iil.” Waxaa sidaas lagu yiri qoraal kasoo baxay maleeshiyaadka maamulka gumeystaha.
Dhanka kale kooxaha wax iska caabinta ayaa fashiliyay isku day ay Yahuuddu ku doonaysay inay kusoo gasho Gaza, Khaan-yoonis dagaallo culus ayaa ka dhacay oo lagu jabiyay Yahuudda.
Isku dhacyada ugu xooggan waxay illaa caawa fiidkii hore ka socdeen Waqooyiga Gaza, kooxaha wax iska caabinta Falastiiniyiinta waxay sheegeen inay beegsadeen maleeshiyaad Yahuud ah oo isku dayay inay gudaha usoo galaan Gaza, ciidankaas waxaa lala galay dagaallo toos ah oo la isku adeegsaday qoryaha sida darandooriga u dhaca iyo gantaallada -Al-Yaasiin 105- loo yaqaan.
Dhanka kale sarkaal Yahuud ah ayaa dhintay kaddib markii uu la qalibmay Taangi uu saarnaa, sida ay xaqiijisay warbaahinta maamulka gumeystaha Yahuudda.
Warbaahinta gumeystuhu waxay sheegtay in sarkaalkaasi Yahuudiga ah uu dhintay sadex kale oo askar ahna ay dhaawacmeen kaddib markii uu waqooyiga dhulalka ay xoogga ku haystaan kula rogmaday Taangi ay leeyihiin ciidanka Yahuudda.
